Հայաստանի առողջապահության աշխատողների արհեստակցական կազմակերպությունների ճյուղային հանրապետական միության ուղերձը Մայիսի 1-ի՝ Աշխատավորների միջազգային օրվա առթիվ։
Այսօր Աշխատավորների համերաշխության միջազգային օրն է, որն այս տարի ամբողջ աշխարհը նշում է արտակարգ իրավիճակում։
Համաճարակի տարածումը դեռևս դադարեցված չէ, միլիոնավոր մարդիկ գտնվում են մեկուսացման մեջ: Իսկ առողջապահության ոլորտի աշխատողները, գիշեր-ցերեկ, կտրված լինելով սեփական ընտանիքներին և երեխաներին տեսնելու հնարավորությունից, վտանգելով իրենց առողջությունն ու կյանքը շարունակում են գտնվել առաջնագծում՝ ջանք ու եռանդ չխնայելով կորոնավիրուսի դեմ պայքարում։
Համաճարակը պարզ ցույց տվեց, թե որքան կարևոր է ցանկացած երկրի անվտանգության համար ունենալ զարգացած, սարքավորումներով հագեցած և որակյալ կադրերով ապահովված առողջապահական համակարգ:
Երկար տարիներ առողջապահության ոլորտը Հայաստանում կառավարության կողմից պատշաճ ուշադրության չի արժանացել: Ունեցել ենք բյուջետային ֆինանսավորման ծայրահեղ ցածր մակարդակ, օպտիմալացում, առավել խոշոր հիվանդանոցների մասնավորեցում, և դա, ըստ էության, ուղղված է եղել ոլորտի նկատմամբ պետության պատասխանատվության բեռի կրճատմանը։
Այսօր ՀՀ կառավարությունը և ժողովուրդը շատ բարձր են գնահատում առողջապահության աշխատողների աշխատանքը: Այսօր մենք պարծենում ենք մեր բժիշկներով, բայց չպետք է մոռանալ և լավ գիտակցել, որ բժիշկները իրենց առօրյա աշխատանքում նույնպես պայքարում են մարդկանց կյանքի և առողջության համար։ Նրանք արժանի են ավելի՛ լավ կյանքի՝ ապահովված լինելով արժանապատիվ և լավ վարձատրվող աշխատանքով՝ հիմնված հարգանքի և արժանապատվության վրա։
Եվս մեկ անգամ հպարտանալով մեր բուժաշխատողներով, մեր զորակցությունն ու երախտագիտությունն ենք հայտնում նրանց, մաղթում առողջություն, կամք, տոկունություն, անսպառ եռանդ և համբերություն:
ՃՀՄ ՆԱԽԱԳԱՀ՝ Գ․ ԱՐՄԱՂԱՆՈՎԱ